„საქკაბელმა“ სამშენებლო მასალების, ტექნოლოგიებისა და უძრავი ქონების რიგით მე-13 გამოფენაში მონაწილეობა მიიღო. ყოველწლიურმა ღონისძიება „Batumi Build“-მა ინდუსტრიის ადგილობრივი და საერთაშორისო წამყვანი კომპანიები გააერთიანა. ვიზიტორებს შესაძლებლობა ჰქონდათ, ადგილზე გასცნობოდნენ „საქკაბელის“ მიერ წარმოდგენილი პროდუქციის უპირატესობებს და წარმოდგენილ ნიმუშებზე დეტალური კონსულტაცია მიეღოთ.
“Batumi Build 2024”-მა 80-ზე მეტი ადგილობრივი და საერთაშორისო კომპანია გააერთიანა, ისეთი ქვეყნებიდან, როგორიცაა: თურქეთი, უკრაინა, აზერბაიჯანი, პოლონეთი და სხვ.
„საქკაბელმა“ დამთვალიერებელს საცხოვრებელი, კომერციული და სამრეწველო გამოყენებისთვის განკუთვნილი საკაბელო პროდუქცია წარუდგინა, რომელიც საერთაშორისო სტანდარტებით მზადდება და როგორც ადგილობრივ, ისე საერთაშორისო ბაზარზე, მომხმარებელთან გაგზავნამდე დეტალურ შემოწმებას ქარხანაში მოქმედ, ხარისხის კონტროლის აკრედიტებულ ლაბორატორიაში გადის.
გარდა ამისა, ვიზიტორებმა ადგილზე „საქკაბელის“ პორტფელში არსებული სხვადასხვა არასაკაბელო პროდუქცია, მათ შორის, ფრანგული ბრენდის, “Schneider Electric”-ის პრემიუმ ხაზის – “Merten D-Life”-ის განათებისა და ტემპერატურის მარეგულირებლები, როზეტები და სხვა ელექტრო ფურნიტურა იხილეს, რომელსაც მაღალი თბური დატვირთვის მიმართ მედეგობა და დახვეწილი დიზაინი გამოარჩევს.
„გამოფენები, როგორიცაა “Batumi Build”, ინფორმაციის გაცვლისა და პარტნიორული ურთიერთობების ჩამოყალიბების ერთ-ერთ საუკეთესო პლატფორმას წარმოადგენს. ღონისძიებამ მოგვცა შესაძლებლობა, არსებული და პოტენციური პარტნიორებისათვის საქართველოს საკაბელო ინდუსტრიის უახლესი მიღწევები გაგვეზიარებინა. გამოფენის ფარგლებში ფართო აუდიტორიას მრავალფეროვანი პროდუქცია, მათ შორის ძალოვანი, თვითმზიდი, არაიზოლირებული, ცეცხლმედეგი, ჰალოგენისგან თავისუფალი, სამონტაჟო და სოლარ კაბელები წარვუდგინეთ, რომელმაც როგორც ადგილობრივ, ასევე საერთაშორისო ვიზიტორებში საკმაოდ დიდი დაინტერესება გამოიწვია. დამთვალიერებლის დიდი ინტერესი ასევე ელექტრო პროდუქციამაც დაიმსახურა. მოგეხსენებათ, ფრანგული ბრენდის, “Schneider Electric”-ის ოფიციალური წარმომადგენლები ვართ, თანამედროვე ელექტრო ფურნიტურა და ავტომატური ამომრთველები კი ძალიან მნიშვნელოვანია სხვადასხვა სივრცის სრულფასოვანი ფუნქციონირებისათვის. ინოვაციებსა და მაღალ ხარისხზე ფოკუსირებით, ჩვენ ვაგრძელებთ საქართველოში წარმოებული, საერთაშორისო სტანდარტის პროდუქციით საკაბელო ინდუსტრიის წინსვლასა და სიახლეების დანერგვას“, – „საქკაბელის“ მმართველი დირექტორი, დავით კაპანაძე.
შეგახსენებთ, „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს, როგორც საკაბელო, ისე ელექტრიფიკაციასთან დაკავშირებულ 2000-მდე დასახელების პროდუქტს სთავაზობს. „საქკაბელის“ პროდუქციას მინიჭებული აქვს CE მარკირება, რაც ადასტურებს, რომ პროდუქტი აკმაყოფილებს ევროპის კანონმდებლობას ჯანმრთელობის, უსაფრთხოების და გარემოს დაცვის შესაბამისობის შესახებ და ევროპის ბაზარზე თავისუფალი ვაჭრობის შესაძლებლობას იძლევა. კომპანიის ერთ-ერთი პრიორიტეტული მიმართულება საექსპორტო ბაზრების დივერსიფიცირება და ქართულ ეკონომიკაში იმპორტის ჩანაცვლებაა.
