მწვანე და მდგრადი ინიციატივების ფარგლებში, „საქკაბელი“ აქტივობების განხორციელებას განაგრძობს. ამჯერად „საქკაბელისა“ და „ბონსაი-მესხის“ პარტნიორობით, სპეციალურად „საქკაბელის“ თანამშრომლებისათვის ბონსაის კულტურის შესახებ სემინარი ჩატარდა.
სემინარში ჩართულმა მონაწილეებმა მინიატურული ხეების სპეციალური ტექნიკით გაზრდის იაპონურ ისტორიასა და ხელოვნებაზე შეიტყვეს, რის შემდგომაც შეხვედრა კითხვა-პასუხის რეჟიმში წარიმართა.
„უწყვეტი განვითარება, სიზუსტე და მდგრადობა ის ღირებულებებია, რომელსაც „საქკაბელი“ და „ბონსაი-მესხი“ ვიზიარებთ. აღნიშნული ღირებულებები მნიშვნელოვან როლს ასრულებს როგორც ბონსაის გაზრდის ხელოვნებაში, ასევე „საქკაბელის“ მიდგომებში მაღალხარისხიანი, საერთაშორისო სტანდარტის საკაბელო პროდუქციის წარმოების კუთხით.
ბონსაის შესახებ სემინარი დინამიკურად წარიმართა. ადგილზევე ვიხილეთ, თუ როგორ ფორმირდება „საქკაბელის“ პროდუქციით ბონსაები. სასიხარულოა, რომ ბონსაი ჩვენს კორპორატიულ კულტურაში სხვადასხვა მიმართულებით წარმატებით ინტეგრირდება. მსგავსი რეკრეაციული, შემეცნებითი სახის აქტივობები გვეხმარება მეტად დავაფასოთ ბუნება, დავამყაროთ მასთან კავშირი და მეტი პასუხისმგებლობით მოვეკიდოთ მას. კორპორატიული სოციალური პასუხისმგებლობის ფარგლებში, ჩვენ მომავალშიც აქტიურად გავაგრძელებთ სხვადასხვა მდგრადი და შემეცნებითი ინიციატივების მხარდაჭერას“, – აცხადებენ „საქკაბელში“.
უკვე რამდენიმე წელია, “საქკაბელის” მხარდაჭერით ბონსაების ფორმირება საკაბელო პროდუქციით ხორციელდება. ცოტა ხნის წინ კი, „საქკაბელსა“ და „ბონსაი-მესხს“ შორის ექსკლუზიური პარტნიორობა გაფორმდა, რომელიც ბონსაის კულტურაზე ცნობიერების ამაღლების სხვადასხვა ღონისძიებას გააერთიანებს.
„მოხარული ვართ, რომ „საქკაბელთან“ პარტნიორობით, მოგვეცა შესაძლებლობა მათი თანამშრომლებისათვის სემინარისთვის გვემასპინძლა. სემინარის ფარგლებში ბონსაის კულტურისა და ტექნიკის შესახებ ვისაუბრეთ. სასიამოვნოა, რომ მსმენელში ბონსაის კულტურამ დიდი ინტერესი გამოიწვია და შეხვედრის განმავლობაში მრავალი საინტერესო შეკითხვა დაისვა. მოხარული ვართ, რომ ჩვენს და „საქკაბელს“ შორის თანამშრომლობა ახალ სახეს იძენს, რომლის ფარგლებშიც შესაძლებლობა გვეძლევა როგორც ფართო აუდიტორია, ასევე „საქკაბელის“ თანამშრომლები ვაზიაროთ ბონსაის უნიკალურ კულტურას.“– აცხადებს “ბონსაი-მესხის“ დამფუძნებელი, ნიკოლოზ მესხი.
შეგახსენებთ, „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს, როგორც საკაბელო, ისე ელექტრიფიკაციასთან დაკავშირებულ 2000-მდე დასახელების პროდუქტს სთავაზობს. კორპორატიული პასუხისმგებლობის ფარგლებში, ‘’საქკაბელი’’ აქტიურად აგრძელებს საკუთარ საქმიანობაში მდგრადი მიდგომების დანერგვას, იქნება ეს საწარმოო პროცესებში განახლებადი ენერგიის მოხმარება, ნარჩენების გადამუშავება თუ სხვ.
