საქართველოს საკაბელო ინდუსტრიის ლიდერი კომპანია, „საქკაბელი“, პრემიუმ კლასის საცხოვრებელ კომპლექს „თბილისი გარდენსთან“ თანამშრომლობას განაგრძობს. პარტნიორობის ფარგლებში, კომპლექსის ელექტრიფიკაცია „საქკაბელის“ მიერ წარმოებული უმაღლესი ხარისხის პროდუქციით ხორციელდება.
მრავალწლიანი ხეებით გაშენებულ 21 000 კვ.მ-ზე გაშლილ პარკში მდებარე „თბილისი გარდენსი“ სამ თაუერს აერთიანებს. ამერიკული NFPA სახანძრო სტანდარტების დასაკმაყოფილებლად, როგორც საცხოვრებელ, ასევე საპარკინგე, ტექნიკურ და საერთო მოხმარების სივრცეებში (როგორიცაა დერეფნები და ლიფტები) ელექტროგაყვანილობის სამუშაოები „საქკაბელის“ პროდუქციით მიმდინარეობს.
„უსაფრთხოება „თბილისი გარდენსის“ უმთავრესი პრიორიტეტია, „საქკაბელის“ პროდუქცია კი მნიშვნელოვან როლს ასრულებს ამ მიზნის მიღწევაში, ვინაიდან კომპანიას ზურგს საკაბელო წარმოების მრავალწლიანი გამოცდილება უმყარებს. უსაფრთხოების საერთაშორისო სტანდარტებთან შესაბამისობის უზრუნველსაყოფად, მეორე თაუერის ელექტრიფიკაცია „საქკაბელთან“ პარტნიორობით განვახორციელეთ – სხვადასხვა დასახელების საკაბელო პროდუქციასთან ერთად, ობიექტის ქვესადგურები, კერძოდ საშუალო და დაბალი ძაბვის კარადები “Schneider Electric”-ის პროდუქციით დავაკომპლექტეთ. პროდუქციამ სრულად დააკმაყოფილა საპროექტო მოთხოვნები და შესაბამისად, მესამე თაუერის ელექტროგაყვანილობის სამუშაოებიც „საქკაბელის“ მიერ წარმოებული სამონტაჟო, ძალოვანი, ჰალოგენის არ შემცველი და ხანძარმედეგი კაბელებით ხორციელდება. კაბელების ნაწილი, რომელიც საკაბელო კონსტრუქციებზე არ მონტაჟდება, დამატებითი უსაფრთხოებისთვის,,საქკაბელის’’ გოფრირებულ მილებში თავსდება. მოხარული ვართ, რომ პარტნიორობის ფარგლებში შესაძლებლობა გვეძლევა „თბილისი გარდენსის“ მობინადრეებისათვის უზრუნველვყოთ უსაფრთხო საცხოვრებელი გარემო და ამავდროულად, მხარი დავუჭიროთ ადგილობრივ წარმოებას“, – აცხადებს პროექტის მენეჯერი ვახტანგ დათუკიშვილი.
შეგახსენებთ, „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს, როგორც საკაბელო, ისე ელექტრიფიკაციასთან დაკავშირებულ 2000-მდე დასახელების პროდუქტს სთავაზობს. „საქკაბელის“ პროდუქციას მინიჭებული აქვს CE მარკირება, რაც ადასტურებს, რომ პროდუქტი აკმაყოფილებს ევროპის კანონმდებლობას ჯანმრთელობის, უსაფრთხოების და გარემოს დაცვის შესაბამისობის შესახებ და ევროპის ბაზარზე თავისუფალი ვაჭრობის შესაძლებლობას იძლევა. კომპანიის ერთ-ერთი პრიორიტეტული მიმართულება საექსპორტო ბაზრების დივერსიფიცირება და ქართულ ეკონომიკაში იმპორტის ჩანაცვლებაა.
